Banan, ağcaqayın və limulu blinçiklər

Hamımız fəsəli və yə blinçikləri sevirik. Bu gün sizə bilinçikin içinə ağcaqayın siroplu banan dolduraraq çay ilə nuş edə biləcəyiniz şirniyyat təqdim edirəm.

Tərkibi:
Xəmir: 1 stəkan un, 1 yumurtanın ağı, 1 stəkan süd, 3 xörək qaşığı soyuq su,  günəbaxan yağı
İç: 4 dilimlənmiş banan, 3 xörək qaşığı ağcaqayın siropu, 2 xörək qaşığı limu suyu

Əvvəl xəmiri hazırladım. Bunun üçün un, yumurtanın ağı, süd və suyu qarışdırıb nə çox duru, nə də qatı olamayan tərkib əmələ gətirdim. Sonra isə soyuducuya qoyub təxminən 10 dəqiqə saxladım.

Tavada günəbaxan yağını isitdim və ənənvi üsulla hər iki tərəfini qızardaraq blinçikləri bişirdim. İsti qalmaları üçün folqa kağızının içində saxlayrdım.

Fəsəlilərim hazır olduqdan sonra banan, sirop və limu suyunu da bir qazançada 1 dəqiqə ərzində qarışdıraraq hazırladım.

Blinçikin bir küncünə bananlardan yığıb üçkünc formada bükdüm.

Nuş olsun!

Göbələk piroqları

Sizlərə bu dəfə fransızların bir çörək növündən hazırlanan çox asan bir təam təqdim edirəm. Fransız mətbəxində çörək seçimi çox genişdir. Bu çörəyi isə baguette (baqet) adlandırırlar. Çörək arası sevənlərin sevimli seçimi olan baguett-in göbələklə kombinasiyası çox ləzzətli alındı.

Tərkibi: 1 kiçik bagguet çörək, zeytun yağı, 250 qram doğranmış göbələk, 2 çay qaşığı limon suyu, 2 xörək qaşığı süd, istəyə uyğun keşniş, duz və istiot.

Əvvəl çörəyi iki yerə böldüm. Bölünmüş hissələri yenidən şaquli olaraq iki yerə ayırdım, alındı dörd hissə. İçindəki yumşaq çörəyi kəsib çıxardım. Zeytun yağını şəkildəki kimi yaxşıca çörəklərə sürtdüm. Daha sonra 220 dərəcə öncədən istidiyim sobaya qoyub 8-10 dəqiqə ərzində rəngi tündləşib xırçıltılı olanadək qızartdım.

Çörəklər qızaran müddətdə göbələk, limon suyu və südü kiçik bir qazanda aşağı hərarətdə bişməyə qoydum. Suyu tam çəkilənədək qaynatdım və keşniş əlavə edib daha bir neçə dəqiqə qarışdırdım. Qazanı qazın üstündən götürüb duz və istiot vurdum.

Hazır olan çörəklərin üstünə göbələkləri əlavə etdim və qəlyanaltı hazır oldu.

Nuş olsun!

photos © vhsoy

Sürpriz küftələr

Bu gün sizə spagetti və ya makaronla servis edilə biləcək ləzzətli küftə resepti təqdim edirəm.

Mozzarella pendiri ilə hazırlanır bu yemək. Küftənin içində əriyən pendir yeməyə xüsusi dad verir.

Tərkibi:
1) Küftə: soğanın 1/4 hissəsi, 1 yumurta, keşniş, 450 qram çəkilmiş mal əti, kub şəkilində doğranmış 100qram mozzarella pendiri, 50 qram un, 2 xörək qaşığı tərəvəz və ya zeytun yağı
2) Göbələkli sous: 25 qram kərə yağı, 50 qram un, 300ml toyuq suyu, 100 qram doğranmış göbələk, 125ml qaymaq, duz və istiot

Soğan, yumurta və azacıq keşnişi təxminən 20saniyə blenderdə xırdaladım. Blenderim kiçik olduğu üçün ətə bu qarışığı, duz və istiot əlavə edib yaxşı yoğurdum. Reseptə əsasən əti də blenderdəki qarışığa qatıb xırdalamaq lazımdır. Hazır olan ətdən bir qaşıq götürdüm və içinə pendirdən qoyub yumurladım. Küftələri una batırıb 10 dəqiqə kənarda saxladım.Sonra yağı tavada isidib küftələrin hər tərəfini 10-15 dəqiqə ərzində bişirdim. Hazır olduqdan sonra onları kağız salfetin üzərinə yığdım.

Küftələr qızaran müddətdə həm də sousu hazırladım. Kərə yağını kiçik bir qazanda əritdim. Sonra unu əlavə edib 1 dəqiqə ərzində qarışdıraraq bişiridim. Qazanı qazın üzərindən götürüb yenə qarışdıraraq hissə-hissə toyuq suyunu əlavə etdim. Qazanı qazın üstünə qaytarıb sous qatılaşanadək qarışdırdım. Sonra isə göbələkləri sousa qatdım. Təxminən 4 dəqiqə ərzində arabir qarışdıraraq sousu qaynatdım. Sonda isə qaymaq, duz və istiot əlavə edib daha bir neçə dəqiqə bişirdim.

Soyumuş küftələri təmiz bir tavaya düzdüm və sousu asta-asta üzərinə tökdüm. Aşağı hərarətdə 10 dəqiqə bişməyə qoydum və hazır oldu.

Nuş olsun!

photos © vhsoy

Keçibuynuzundan brauni

Uzun zamandır ki, bloqumu yeniləyə bilmirdim. Nəhayət ki, boş vaxt tapıb sevimli məşğuliyyətlərimdən birini yenidən sizinlə bölüşürəm.

Şirniyyatın reseptini yazmamışdan öncə tərkibinə qatılan keçibuynuzu tozu haqqında məlumat vermək istəyərdim. Mən güclü allergiyadan əziyyət çəkirəm, daha doğrusu, çəkirdim. Ta ki, Vüsalın anası televiziyada allergiyaya qarşı istifadə oluna bilən bu bitki haqqında eşidənədək. Xoşbəxtlikdən meyvəsini Londonda yerləşən türk dükanlarından birində tapdım və yeməyə başladım. Tez bir zamanda mənə təsir etməyə başladı. Demək olar ki, heç bir dərmandan istifadə etmirəm artıq.

Keçibuynuzu (ingiliscə carob) Aralıq dənizi ölkələrində yetişən ağacdır. Qədimdə şəkər əvəzi istifadə olunan keçibuynuzunu meyvə, toz və bəhməz halında əldə etmək mümkündür.

Aranızda allergiyadan əziyyət çəkən varsa, mütləq istifadə etməyi məsləhət görürəm.

Bir xeyli müddətdir ki, şəkərdən istifadəni dayandırdığımdan, şəkərsiz bişintilərlə başımı qatmağa çalışıram. Bu resepti mənə bir tanışım vermişdi.

İndi isə brauninin hazırlanma qaydasını sizinlə paylaşıram.

Tərkibi:yarım stəkan un, 6 xörək qaşığı keçibuynuzu tozu, bir çimdik duz, yarım stəkan bal, 200 qram kərə yağı, 2 yumurta, istəyə uyğun xırdalanmış ləpə

 Əvvəlcə unu, keçibuynuzu tozunu və duzu bir qabda qarışdırdım.

Sonra isə yağ və balı mikserlə təxminən 5 dəqiqə çalıb yumurtaları əlavə etdim. Daha bir neçə dəqiqə də qarışdırdım. Qeyd etməliyəm ki, yağ düyün kimi qalmamlıdır.

Unlu qarışımı kremə əlavə edib əvvəl taxta qaşıqla, sonra isə mikserlə yaxşıca çaldım.

Aşağıdakı kimi alındı:

Qarışığı öncədən 220 dərəcədə isitdiyim tavaya əlavə etdim. Tavanının dibini əvvəlcədən azca yağlamaq gərəkdir. İstəyə uyğun olaraq doğranmış ləpələrdən də üzərinə vurmaq olar.

Braunilər təxminən 35-40 dəqiqəyə hazır oldular. Onları servis etməmişdən öncə tavanın soyumasını gözləmək lazımdır.

Nuş olsun!

photos © vhsoy

Kəsmikli banan

Bu gün bir çoxumuzun sevdiyi kəsmikli bananın hazırlanmas üsulunu sizə təqdim edirəm. Bu günlərdə hazırladığım bananlar dadına görə məni çoxlu tərif sahibi elədiyinə görə sizə də tez biz zamanda bişirməyi məsləhət bilirəm :)

Xəmir: 4  stəkan un, 200 qram kərə yağı, 200 qram xama (və ya qatıq), 1 paçka qabartma tozu, azca duz
İç: 2 paçka kəsmik, 100 qram kərə yağı, 1 stəkan şəkər, 1 stəkandan azca aşağı un və istəyə uyğun vanil tozu

İlk öncə xəmiri hazırladım. Xəmir ələ yapışmayan yumşaq olanadək yoğurdum və soyuducuya qoydum. Bu müddət ərzində içi hazır etdim. 

Xəmiri qozdan 1 azca böyük olaraq yumrulayıb kiçik kündələr düzətdim. Sonra onları yayıb içinə 1 xörək qaşığı kəsmikli qarışığdan yerləşdirdim və kənarlarını birləşdirdim (kənarları birləşən tərəf altda qalmalıdır). Xəmiri bumeranq formasına salıb 200 dərəcə öncədən isitdiyim sobada 15-20 dəqiqə müddətində bişməyə qoydum.

Bananlarım hazır oldu.

Nuş olsun!

Banan və manqo kokteyli

Yay fəslinin son günlərinə günəş rəngi qatacaq bir kokteyl var sırada. Çox ləzzətlidir, hazırlamağı tövsiyyə edirəm :)

Tərkibi: 1 kiçik manqo, 1 kiçik banan, 150ml süd, 120ml portağal şirəsi, 2 çay qaşığı limon suyu, 1 xörək qaşığı şəkər

Qabıqlarını soyub doğradığım banan və manqonu blenderə qoyub üzərinə portağal şirəsi, limon suyu və şəkəri əlavə edib 30 saniyə blenderin ən yüksək sürətində qarışdırdım.

Kokteyl hazır oldu.

Nuş olsun!

Qarğıdalılı kartof kotleti

Bu gün sizə tərkibinə qarğıdalı qatılmış ənənəvi kartof kotletini təqdim edirəm.

Tərkibi: 450 qram sürtgəcdən keçirilmiş kartof, 1 orta boy sürtgəcdən keçirilmiş soğan, 200 qram konservləşdirilmiş qarğıdalı, 50 qram un, 1 ədəd çırpılmış yumurta, 4 xörək qaşığı süd, tərəvəz yağı, duz və istiot

Dərin bir qabda unu, yumurtanı, südü, duz və istiotu yaxşıca qarışdırıb bir kənara qoydum. Sürtgəcdən keçirdiyim kartofu pambıq parçanın içinə qoyub parçanı hər iki tərəfdən (konfet kağızı formasında) sıxaraq kartofun acı suyunu çıxardım. Sonra kartof, soğan və qarğıdalını qarışığa əlavə edib qarışdırdım. 

Tərkibdən 1 xörək qaşığı isidib yağ vurduğum tavaya əlavə etdim. Kotletin hər iki üzü qızaranadək təxminən 3-4 dəqiqə bişirdim.

Nuş olsun!